குழப்பம், எந்நொடியும் நம்முடன் தொத்திக்கொண்டிருப்பது. அதைப் பிரிந்து நம்மாலும் இருக்க முடியாது அதுவும் நம்மைப் பிரிந்து இருக்காது! படிக்கும்போதே நீங்கள் நினைக்கிறீர்கள், அப்படியா? குழப்பமும் நாமும் இரண்டற கலந்துவிட்டோமா?
செம்புலப் பெயல் நீர் போல அன்புடை நெஞ்சம் தாம் கலந்தனவோ? கொஞ்சம் அதிகப்படியாகக் கூறிகிறோனா?
அப்படியே படிப்பதை நிறுத்திவிட்டு, உங்கள் மனவோட்டங்களைச் சற்று உன்னிப்பாகக் கவனியுங்கள்.
- மதியம் என்ன சாப்பிடலாம்?
- நாளைக்கு என்ன உடுத்திக்கொள்ளலாம்?
- வாரயிறுதியில் எங்குச் செல்லலாம்?
- பிள்ளைகளுக்கு என்ன தேர்வு?
- நான் சொன்னது சரியா?
- தான் செய்தது அவரைப் புண்படுத்தியதா?
அப்பப்பா!!😎 எத்தனை எண்ணங்கள்? எத்தனை வினாக்கள்? இவற்றில் ஏதேனும் ஒன்றைப்பற்றிக்கூட நீங்கள் நினைக்கவில்லை என்றால் நீங்கள் பொய்யராகிவிடுவீர்கள்😁.
இப்படிப் பட்டியலிடும் குழப்பத்திலிருந்து தப்பிக்கவே நாம் முன்னோக்கிச் செல்லும் வாழ்க்கை ஒரு பயணமாகிறது. பயணம் பந்தயமானதை மற்றொரு சந்தர்ப்பத்தில் பேசுவோம்.
“எல்லாம் சரியாகிவிடும்!”
“இதுவும் கடந்து போகும்” – இப்படிச் சொல்லித்தான் மனபாரத்தைக் குறைத்துக்கொள்கிறோம். அனைத்துக் குழப்பங்களையும் தாண்டி வாழ்க்கையெனும் பயணத்தின் (பந்தயத்தின்) வெற்றிக்கோட்டைக் கண்டிப்பாகத் தொடுவோம் 💪🏽 ஒவ்வொருவரும் அக்கோட்டைத் தொடுவதற்காக எடுத்துக்கொள்ளும் நேரமும் வழியும்தான் வேறுபடுகிறது. சிலருக்குக் கோடுகள் பக்கத்தில் சிலருக்குத் தொலைவில் மற்றும் சிலருக்குக் கானல்நீராகிறது 😢.
குழப்பங்களைக் கடந்து வெற்றி பெறுவது என்பது நிச்சயம், இதைத் திடமாக நம்புவோம். அந்நம்பிக்கையே நம்மை நம் வெற்றிக் கோட்டிற்கு இட்டுச் செல்லும். வெற்றிக்கோட்டை அடைந்ததும் வாழ்க்கை முடியாது, தொடரோட்டம்போல் அடுத்த வெற்றிக்கோட்டை நோக்கிப் பயணிப்போம்🙌🏽
Leave a comment